بقلم : د. زاهر حجو "الطبل بدوما والعرس بحرستا" رسالة إلى الإعلام السوري ..

2014-10-09 19:44:06 بقلم د.زاهر حجو مابعرف ليش بذكرني هالإعلام بالمتل الشعبي "الطبل بدوما والعرس بحرستا" ، مع أنو ماضل عنا أعراس وبلدنا كلها صارت خيم عزاء ..
يعني معقول مثلا يطلع برنامج عن تجهيز "السَلَطة" وتقطيع البقدونس بالوقت اللي عصابات داعش عم تقطع فيه رؤوس شبابنا وعاملة البلد "سَلَطة" ، ومعقول صحيفة الوطن ( نص الحكومية ) تكتب نحن والأميركان في خندق واحد لمواجهة الإرهاب ؟ّّّ!
طيب كيف زبطت معها ؟ !!
أساسا نحن عم نقاتل بالأرض وهنن بالسما ، وبعدين المكان الوحيد اللي خرج يتواجد فيه الأميركان هو نفق مظلم ( مو خندق ) وآخرته مجرور صرف صحي ..
وماهو منطق نضل نحكي ونترقب جزء جديد من باب الحارة وعنترياته الفاضية ، بالوقت اللي فيه المسلحين احتلوا تلة (الحارة) بدرعا واللي عجزت عنه "اسرائيل" ، ومابقبل عقل تكون الدنيا خربانة بمورك (المشهورة بالفستق) بنفس الوقت اللي عم ينعرض فيه برنامج عن تجهيز الحلويات بالفستق والكاجو ..
والله ، الله ماقالها أنو كون ( باعتباري الطبيب الشرعي لحلب ) عم أفحص جثث عشرات الشهداء المدنيين يلي استشهدوا بالقذايف ، بالوقت اللي تجيني على موبايلي رسالة من سانا "مقتل اثنين وإصابة ثلاثة باشتباكات في بنغازي" ؟؟!!
وبالنسبة لحلب بحب ذكّر أنو هي مدينة تابعة للدولة السورية ولسا ما احتلتها (لا قدر الله) حنازير "الدولة الاسلامية" ، وشو سر هالتعتيم الاعلامي عليها ؟ ..
ياهل ترى سبب هالعتمة والتعتيم ، يمكن لأنو مافيها كهرباء ، أو لأن كتير من إعلاميينا ماعندن دم ، ومتل مابتعرفوا المي بتشكل معظم تركيب الدم ، وحلب كمان مافيها مي ، ورح اعترفلكم بسر الناس هون بحلب ، الناس ماعم تابع لا الإعلام المغرض "لأنه كذاب وفتنجي" ولا الإعلام السوري لأنه معه "انفصام عن الواقع" ، بتجي الكهرباء ساعة ونص وبهالوقت القصير بصير كل حلبي أسرع من (بن حونسون) و(سعيد عويطة) بالركض ورا المي وشحن مايمكن شحنه ، مع أنو رح ينفجر قريباً من كتر الشحن (الحلبي مو أجهزته) وآخر الشي بحب قوله لجماعة الاعلام "اللي استحوا ماتوا والأبطال عم يستشهدوا" ..
وللاسف التنين رح ينفحصوا عندي ، بس المنيح أني مارح شوفكم لا بالطبابة ولا بالتلفزيون ...

عكس السير - د.زاهر حجو

تعليقات الزوار إن التعليقات الواردة لا تعبر بالضرورة عن رأي وفكر إدارة الموقع، بل يتحمل كاتب التعليق مسؤوليتها كاملاً
أضف تعليقك
الاسم:  *
عنوان التعليق:  *
النــص:  *
يرجى الانتظار
القائمة البريدية

اشترك في القائمة البريدية لتصلك نشرة مجانية دورية بأهم الأخبار

حالة الطقس