يوميات مواطن "منتوف" .. بقلم أحمد دهان

2014-10-20 16:17:50 المواطن بسورية صايرة حياته اليومية مسلسل أكشن "بخماسيات" تعرض كل يوم ..
من الصبح لآخر الليل عبركض مشان لقمة عيش ولاده ، بشتغل شي أربع خمس شغلات مشان توفي معه ، وإذا شاف بطريقه وهو راجع ع البيت تحميل "عفش" أو "زق" بلوك مارح يقصر لأن العيش صارت صعبة وبتقرف.
وقت بدو يرتاح بجي وقت تأمين المياه مشان مايموت هو وولاده من العطش ، وبعدها بدو يوصل الكهربا اللي جاي من الأمبيرات باعتبار ماعاد في دولة تأمن الكهرباء والمياه.
الخبز صار بدو ألف واسطة وإذا كنت شاطر بتجيب كم "أزعر" وبوجهك على الفرن.
قرب الشتاء وصار ع البواب والمواطن كل همه كيف بدو يدبر حق كم ليتر مازوت ، باعتبار سعر الليتر صار بعد تدخل سماسرة الدولة بـ 150 ل.س هي إذا مو أكتر.
سيارات مشان النقل ماعاد في لأن البنزين صار غالي ومفقود والكل عبقول القعدة بالبيت أرحم من الطلعة ع السيارة ، بهالحالة المواطن صار بدو يشتري أو يستأجر "جحشة" الله يعزكن مشان التنقلات.
بس كل هالشي وحكومتنا والمسؤولين عنا بهالبلد مو غافلين عن هموم المواطن ، باعتبارهم "العين الساهرة" على أمن وأمان الوطن والمواطن.
المسؤولين والحكومة بهدف الحد من هموم المواطنيين صار عقدوا أكتر من 300 جلسة ، ومجلس الشعب ومجالس الإدارة المحلية صار عقدوا أكتر من 100 جلسة ، بس لا حدا يسألني إذا أجت المي أو الكهربا أو الشبكة إلا ما أجت .. بصراحة أنا بخجل أجاوب على هيك سؤال.
شاشة التلفزة السورية بجد شاشة رائعة واكبت نبض الشارع وأوجاع الناس ، طالعوا لقاء مع مدير شركة مياه السويداء لبحث واقع المياه ، وعملوا تحقيق فظيع حول انتهاكات رئاسة جامعة حلب للجمال العمراني للمدينة بتنفيذ سور للجامعة طبعا على أساس مدفع جهنم والبراميل والصواريخ المتفجرة مالها علاقة بالموضوع.
وطبعا إعلامنا الوطني كان بجانب المواطن وحتى جوا قلبه وعرف كل مشاكله ورصدها ضمن برامج كتيرة ، شي بيحكي عن التوافق الجنسي وشي بيحكي عن المراهقة وشي بعمل لقاءات عن الشيخوخة المبكرة وبتمنى ماحدا يضحك لأنه عبحكي عنجد مو مزح .. !!
لسى إذا بتابعوا برنامج الصحة للجميع وأرضنا الخضرا والأيدي الماهرة شو بدكن تحكوا .. أحسن شغلة "بلا تعليق"

عكس السير - أحمد دهان

تعليقات الزوار إن التعليقات الواردة لا تعبر بالضرورة عن رأي وفكر إدارة الموقع، بل يتحمل كاتب التعليق مسؤوليتها كاملاً
أضف تعليقك
الاسم:  *
عنوان التعليق:  *
النــص:  *
يرجى الانتظار
القائمة البريدية

اشترك في القائمة البريدية لتصلك نشرة مجانية دورية بأهم الأخبار

حالة الطقس